Sessione di l’Assemblea di Corsica u 24 di nuvembre di u 2016 : discorsu di u Presidente Jean-Guy Talamoni

Vi parleraghju oghje di un sugettu di primura, ch’avemu piazzatu in core à a nostra pulitica è chì ghjè u tema di una di e trè « Cunferenze permanente » ch’aghju lanciatu dopu à l’elezzione di dicembre scorsu : l’educazione.

Da i tempi landani, i Corsi anu cunsideratu a cunniscenza cum’è u tesoru u più preziosu, è rispettatu assai quelli chì u tramandavanu. A ci dice a nostra storia. Tenimu per testimonii i rimproveri fatti à u diciottessimu seculu da l’autori naziunali à i Genuvesi eppò dopu à i Francesi nantu à stu puntu. Pasquale Paoli ellu stessu avia messu l’educazione à u centru di a so azzione publica. Di st’azzione, l’apertura di l’Università fù u mumentu u più sulenne.

Oghje chì ghjè oghje, a quistione hè più chè mai d’attualità : u sistema educativu francese, quellu chì s’impone in u nostru paese, viaghja à capu in ghjò : i studii « PISA » di l’OCDE – è ancu quelli di u ministeriu di l’educazione in Parigi – mettenu in risaltu dui punti maiò :

  • a Francia tene a prima piazza per a crescita di l’inugualità ;
  • cuntinueghja à calà u livellu di i giovani, dunque a perfurmenza di u sistema educativu.

Un studiu di u Ministeriu nant’à u livellu di i giovani in urtugrafia1 esciutu a settimana scorsa dice quantu elle calanu e cumpetenze dipoi vinti anni.

In Corsica, a situazione hè ancu di più acuta postu chè n’avemu un livellu d’abbandonu sculare superiore à quellu di a Francia è chì l’inugualità sò più forte quì chè in altrò.

D’altronde, l’evoluzione di a sucetà aurupea è di u so sistema di valori pruduce i so effetti in Corsica dinù. U soldu era un mezu. Hè diventatu una fine. E ghjente ùn sò più ghjudicate nantu à ciò ch’elle sò o ciò ch’elle facenu, ma nantu à ciò ch’elle anu… In stu cuntestu, a cultura è l’educazione passanu spessu dopu à tutti l’altri settori. A so svalutazione ripresenta un veru scumpientu è i pulitichi anu sicuramente una respunsabilità tamanta. Di stu disprezzu, una parte di u populu hà ricevutu u missagiu è si vedenu quì, in Corsica, affari chì ùn si pensavanu mancu trent’anni fà : cum’è si puderebbe adimette di vede i nostri insignanti cunfruntati à l’arruganza di certi parenti, riceve l’insulti è certe volte ancu i colpi ?

Aghjustemu à u bilanciu i prublemi detti dì « gestione di a diversità culturale » chì rendenu a situazione assai più cumplessa. N’avemu parlatu quì ùn hè tantu : u sviluppu di l’islamisimu radicale è di certe prattiche settare tocca in particulare u mezu sculare, senza chì l’amministrazione porti sempre a bona risposta à e dumande angusciate di i prufessori. Ùn vogliu quì mette in causa à nisunu chì a sò : u prublema hè difficiule è nimu ùn dispone di l’arte magica chì permetterebbe di cambià e cose d’un colpu.

Ma ciò chì si pò fà, è chì i rispunsevuli pulitichi chè no simu devenu fà, ghjè di prupone urientazione nove. D’altri paesi ch’anu vistu u settore educativu arruvinatu, anu cunnisciutu un risaltu di u livellu è di l’equità sculare cù pulitiche adatte. Tuttu ùn si pò micca imprestà, ci tocca à inventà u nostru mudellu.

  • A prima primura serà di riaffirmà a piazza di l’educazione : quessa ùn hè solu un vettore essenziale di qualità è di livellu di vita ma dinù a cundizione d’eserciziu di a demucrazia vera. U votu senza cunniscenza ùn hè demucrazia.
  • A seconda hè a cunsequenza di a prima : u mistiere d’insignante essendu centrale in a sucetà, quelli chì u sceglienu malgradu e difficultà anu u dirittu micca solu à u rispettu ma à tutta a nostra ricunniscenza. Avemu digià ricevutu quì l’insignanti è i capi di stabilimenti. Aghju cumminciatu dinù à scuntrà li nantu à u so locu di travagliu, in Sartè, in Purti Vechju, in Fiumorbu… A feremu torna è, per contu meiu, a mio porta serà sempre aperta per elli.
  • A terza hè di cumincià à trattà i prublemi di gestione di a diversità culturale : ancu s’è sti prublemi toccanu tutti i duminii di a vita, si sà chì i prufessori sò in prima linea. Ci vole à cuncilià l’apertura à l’altre culture è u rispettu di quella di u populu di dirittu nant’à a terra di Corsica : u populu corsu.
  • A quarta hè di migliurà e cundizione materiale di travagliu è d’amparera, di a scola materna à l’università. Malgratu e difficultà finanziarie, ci hà da vulè à fà i sforzi nicessarii per u sviluppu di u numericu in tutte e scole, per u sustegnu à l’innuvazione pedagogica, è per a furmazione di i furmatori. Per tutti sti sugetti avemu digià deliberatu è avanzatu ! Sò detti ma sò fatti dinù.
  • A quinta hè d’andà versu sta « sucetà di l’amparera », cum’ellu dice u premiu Nobel Joseph Stiglitz, induve l’insignamentu hè ricevutu longu a vita, sguassendu a fruntiera trà furmazione iniziale è furmazione cuntinua.
  • A sesta cuncerna u duminiu linguisticu. U nostru scopu hè di fà chì, quale ella sia a so urigine, un zitellu chì campa in Corsica possi diventà un citadinu corsu apertu nantu à u mondu. A lingua corsa hè a nostra lingua naziunale, porta i valori di u populu corsu. Custituisce u primu vettore di cuezione di a nostra sucietà. U francese hè una bella lingua è i Corsi ne anu a maestria. Ci vole à tene ne contu cum’è d’una richezza maiò. U bislinguisimu ùn basta è u plurilinguisimu hè una necessità ind’u mondu oghjincu. Sicuramente chì u corsu ci apre e porte di l’altre lingue latine, à cummincià per u talianu. Ma ùn basta. L’inglese, a sapete, l’amparemu à a scola dipoi anni è anni. Eppuru, in a pratica, i risultati ùn sò boni. Nantu à sta quistione dinù, u sistema educativu attuale face vede i so limiti. D’ùn parlà l’inglese cum’è a facenu i citadini di a piuparte di i paesi aurupei hè per noi una difficultà, nantu à u pianu culturale, di sicuru, ma dinù ecunomicu. Ci vole à cambià sta situazione. Quachì ghjornu fà, u ministru di l’educazione di Malta, quinta destinazione in u mondu per l’amparera di l’inglese, m’hà prupostu un accordu di scambii linguistichi per sviluppà a lingua inglese in Corsica è a lingua francese in Malta. Ghjè una pista interessantissima chè no simu in traccia di studià.

Eccu. Ci serebbenu tanti altri sugetti liati à l’educazione, ma ùn ne simu micca à a fine di u parcorsu di reflessione. Per contu meu, aghju da cuntinuà u mio travagliu di cunsultazione in u quadru di a cunferenza permanente nantu à l’educazione. D’altronde, per arrichisce u dibattitu, aghju da dumandà à u Presidente di u Cunsigliu Ecunomicu Suciale è Culturale di fà realizà un studiu nantu à u sistema educativu attuale in Corsica è l’evuluzione chì si ponu imaginà è almanaccà.

À ringrazià vi.

4 Commentaires

  1. Essai: j’ai écrit un commentaire mais ne suis pas sur qu’il soit parti:
    si cet essai est positif, je le réédite!!….Vive l’informatique..;quand elle marche!….
    Ph.SIFFLET

    • Essai négatif: quand je clique sur »laisser un commentaire », il ne se passe rien…Ou bien comme à l’instant, la page se réaffiche…avec le rectangle de commentaire vidé!…

  2. Essai négatif: quand je clique sur »laisser un commentaire », il ne se passe rien…Ou bien comme à l’instant, la page se réaffiche…avec le rectangle de commentaire vidé!…

    • Réédition:
      Débutant en étude de la langue Corse, je viens de commencer à lire ce discours de Mr.J.G.Talamoni sur un sujet qui me tient à coeur: l’enseignement de la langue Corse. Ceci n’est qu »un avis, l’expression de ma conviction, de mon souhait: il faut, tant qu’il en est encore temps, sauver une belle langue, propriété inaliénable et expression de la culture d’un peuple hautement sympathique, accueillant, et encore « humain ».
      Ceci en attendant de pouvoir, à très brève échéance, vous envoyer un commentaire approprié de cette intervention de Mr.J.G.Talamoni, en qui, j’en suis certain, on peut avoir confiance.
      Incù amicizia.
      Philippe J.SIFFLET

Laisser un commentaire

Votre adresse de messagerie ne sera pas publiée.


*