ASSEMBLEA DI CORSICA : U DISCORSU DI U PRESIDENTE

 

Care culleghe, cari culleghi, 

Dui ghjorni fà, aghju ricevutu duie lettere di u Primu ministru Edouard Philippe. 

A prima cuntenia a redazzione sana di l’articulu trattendu di a Corsica ch’ellu prupone d’integrà u guvernu à a Custituzione francese. L’aghju trasmessu à i presidenti di gruppi di a nostra Assemblea. Malgradu u cummentu di u Primu ministru chì cerca à fà passà st’articulu per un avanzata maiò à prò di a Corsica, tuttu ognunu capiscerà à a lettura chè no simu alluntanati assai di u livellu necessariu per risponde à a vuluntà pulitica di i Corsi, manifestata da u scrutinu di dicembre scorsu, alluntanati assai di a pruposta più chì maiuritaria di a nostra assemblea, alluntanati infine di una soluzione à i bisogni cuncreti di u nostru populu in parechji duminii cum’è u fundiariu o a fiscalità di u patrimoniu, vale à dì l’anzianu arrestatu Miot. 

Simu custretti di custatà chì neguziazione ùn ci n’hè micca statu, ne mancu un dialogu o una simplice discussione. Noi, avemu presentatu e nostre dumande è elli anu finitu per rende publicu u testu ch’elli avianu scrittu i so servizii parechji mesi nanzu. Fà passà per un dialogu una messa in scena in giru à un tavulinu – ch’ellu sia corsu o pariginu – ci pare assumilià si à una scruccuneria intellettuale. Per contu nostru, malgradu i nostri dubbiti è ancu i nostri suspetti, avemu cuntinuatu à cercà à cunvince per ùn piglià u risicu di fà mancà à a Corsica un uccasione d’avanzà. 

Avà ch’avemu a prova di a gattiva fede di i nostri interlocutori, ùn pudemu cuntinuà cum’è s’è nunda fussi, chì serebbe non solu perde u nostru tempu ma dinù accittà chì l’istituzione di a Corsica sianu inghjuliate. Hè per quessa chì, per contu meiu, aghju ricusatu, duie volte digià, di riceve ministri parigini in visita in Corsica. 

Cum’è presidente di issa Assemblea, vi duvia issa spiecazione. Di sicuru, ùn hè mancu à pena una pustura è a mio attitudine cambierebbe à parte si di u mumentu chì guaranzie serebbenu date di un travagliu seriu è onestu incù u guvernu nantu à un sugettu. Per avà, onestità ùn ci n’hè da a parte di Parigi. 

A seconda lettera di u Primu ministru risponde à quella chì li aghju mandatu nantu à u cumpurtamentu chì serebbe statu quellu di u Direttore di l’impositi in Corsica, secondu l’inseme di i sindicati. U Primu ministru piglia a difesa di u Direttore è face prevale a versione di quessu custì nantu à quella di tutti i sindicalisti corsi. In conclusione, ùn si serebbe passatu nunda. « Circulez, il n’y a rien à voir ! » cum’ellu si dice quandu l’affari sò in francese. 

Sta seconda lettera ch’aghju ricevutu nanz’eri di u Primu ministru, l’aghju tramessa dinù à i gruppi di l’Assemblea. Tratta di un sugettu sfarente di a prima ma mi pare esce di listessu statu di spiritu, di listessu disprezzu. 2 

Qualchì ora fà, in America, u Presidente Macron hà citatu un libru famosu di Alexis de Tocqueville : « Di a dimucrazia in America ». Per contu soiu, Valéry Giscard d’Estaing n’avia scrittu unu altru chjamatu « Démocratie française ». I Corsi – ancu per ùn avè lettu issu libru- cummencianu à cunnosce la bè sta demucrazia francese : quella chì ricuseghja di crede i sindicalisti quand’elli sò corsi. Quella chì ùn tene nisun’contu di u parè di 57% di i Corsi chì anu vutatu secondu e regule eletturale fissate da u parlamentu francese è sottu à u cuntrolu di u prefettu mandatu da Parigi. 

Quessa a demucrazia, ci vole à dì la, ùn s’appieca micca à i Corsi. 

À ringrazià vi 

Soyez le premier à commenter

Laisser un commentaire

Votre adresse de messagerie ne sera pas publiée.


*